നാട്യലോകധര്‍മ്മി

അന്നേരം ലോകധര്‍മ്മി നാട്യധര്‍മ്മിയോട്‌പറഞ്ഞു :
വല്ലാതെ ബോറടിക്കുന്നു, എന്തെങ്കിലും പറയ്‌
നാട്യധര്‍മ്മി
ആഗോളമായൊന്നവലോകനം ചെയ്ത്‌, മുരടനക്കി
നാടകാന്തം കവിത്വം വചനത്തില്‍ വരുത്തിഇങ്ങനെ പറഞ്ഞു തുടങ്ങി(നാന്‍) :
തീര്‍ച്ചയായും ഉണ്ടായിരുന്നുചരിത്രാതീതകാലം മുതലേ തന്നെ നീ പറഞ്ഞതു പോലെയുള്ള പ്രശ്നങ്ങള്
‍എന്നാല്‍ അതെല്ലാം ബൗദ്ധികതലത്തില്‍ ചര്‍വ്വണം ചെയ്യുമ്പോള്‍,
അതു മാത്രമല്ല,പ്രത്യയശാസ്ത്രപരമായി അള്‍ത്തൂസ്സര്‍ പറഞ്ഞിട്ടുമുണ്ട്‌,
നിനക്ക്‌ ഓര്‍മ്മയുണ്ടോ എന്ന്‌ എനിക്കറിയില്ല
ഗ്രാംചി തടവറയില്‍ കിടന്നപ്പോളും
ചെ ബൊളിവിയയില്‍ വച്ചും അത്‌ അനുഭവിച്ചിട്ടുണ്ട്‌

ഫൂക്കോ ഇതിനെപ്പറ്റി പറഞ്ഞിട്ടുള്ളത്‌ ....(നാശം!പെട്ടെന്നോര്‍മ്മ വരുന്നില്ല)

പക്ഷേ, ഞാനിപ്പോള്‍ നിന്നോടു പറയാന്‍ പോകുന്നത്‌
സംസ്കാരവ്യവസായത്തില്‍ ബോറടിക്കുള്ള സ്ഥാനം എന്നതിനെക്കുറിച്ചാണ്‌

ഭരത മുനി നാട്യശാസ്ത്രത്തില്‍ പറഞ്ഞിരിക്കുന്നത്‌.....

ലോകധര്‍മ്മി അതൊന്നും കേട്ടില്ല
കേട്ടാലും മനസ്സിലാവുമായിരുന്നുമില്ല
വെറുമൊരു ലോകധര്‍മ്മി
നാട്യശാസ്ത്രത്തെക്കുറിച്ച്‌ അതിനെന്തു ചുക്കറിയാം?

അപ്പോള്‍ ഒരു നിഴല്‍ ജലോപരിതലത്തില്‍ പടര്‍ന്നു
അതു മീനോ പായലോ
പുഴയുടെ ഓര്‍മ്മകളോ എന്ന്‌
ലോകധര്‍മ്മി വ്യാകുലപ്പെട്ടു

ഒരു കാറ്റില്‍പുഴ മൊത്തം മാഞ്ഞുപോയേക്കാം
ചെറിയ ഒരു ചാറ്റമഴയില്‍ദ്വീപ്‌ അങ്ങനെതന്നെ മുങ്ങിപ്പോയേക്കാം
എന്ന്‌ ഉറക്കെ ശ്വാസം വിടാന്‍ പോലും ആധി പൂണ്ടു

നാട്യധര്‍മ്മിയോ
ശാന്തസമുദ്രം വഴി വന്‍കര കയറി
അത്‌ലാന്റിക്കിലൂടെ പുറത്തേക്കുള്ള വഴി കണ്ടെത്തി,
തിരിച്ച്‌ സംസ്കാരസാഗരങ്ങള്‍ താണ്ടി നാടുചുറ്റി പര്യടനം നടത്തവേ,

പെയ്ത്തു വെള്ളത്തില്‍തന്നെ അടിതെറ്റിയ ലോകധര്‍മ്മി
പുഴയുടെ അടിയിലൂടെ സംസാരസാഗരത്തിലേക്ക്‌
അവിടെനിന്നു
സംസാരമോ ഭാഷയോ ഇല്ലാത്ത
ജലപ്രണയത്തിലേക്ക്‌-


താണുതാണ്‌